يعني ايه Gamification ؟

Gamification

مصطلح جديد يبدو غير مألوف وفعلا يعني ايه Gamification ؟!

علشان نتكلم في الموضوع باستفاضة محتاجين مقالات علي الاقل لمدة 10 ايام كل مقالة دسمة علشان نقدر نغطي اجزاء كبيرة منه ودا اللي هنعمله بداية من النهاردة ولمدة 10 ايام قادمة ان شاء الله علشان نشرح بتفصيل يعني ايه Gamification

في البداية خلونا نفرق مابين شوية مصطلحات علشان نفهم مصطلح الـ Gamification يعني ايه ؟!

اولا : يعني ايه Game :-

الـ Game هي لعبة هدفها ممكن يكون بلا معني ممكن يكون بس لمجرد المرح والفرح زي العاب الـ Video game كان في العاب كتير بنلعبها تفضل تقاتل لحد ما تقابل الوحش في النهاية وتغلبه وخلاص كدا هييييه :D ... في مكسب وخسارة بس مفيش هدف تعليمي واضح زي ما قلنا

ثانيا : يعني ايه Game-based learning :-

ودا النوع اللي بيعتمد علي هدف تعليمي اثناء اللعب زي مثلا بنك الحظ اكتر واحد هيبقي معاه الفلوس لكن في كمان objectives تانية وهي ان كل واحد من الناس بيبدأ يلعب علشان يبقي معاه فلوس كتير وبالتالي بتتعلم مهارات التفاوض واوقات مهارات الاقناع اثناء المزادات وهكذا ومع تطوير اللعبة دي في شاب مصري عمل لعبة اسمها Business county اللعبة دي بتعلمك بشكل صريح مهارات التفاوض والاقناع وريادة الاعمال وكل ما تحتويه من مهارات فعلا لعبة ممتازة مبنية علي اهداف تعليمية واضحة.

ثالثا : يعني ايه Gamification بقي ؟!

الـ Gamification هو انك تـ create حاجة زي لعبة باهداف تعليمية وفي جو تدريبي واوقات كتير بتخلق اجواء اتصال بين المنافسين وبعضهم سهلة وتقدر تعملها كمقدم العملية التعليمية لاي موضوع تعليمي هيناسبة الاسلوب دا من التدريب انت بتطبق كل اساليب اللعبة في حاجات هي اصلا مش لعبة لكنها بيتم تطبيقها في نطاقات اخرى زي التسويق مثلا ككورس او مجالات الادارة او الـ soft skills ليست كلعبة لكن بعناصر اللعبة.

تقدر تقول دا التطور الطبيعي للـ Game يوصل لمرحلة الـ Gamification بشكل مختلف والسؤال المهم اللي اكيد بيدور في اذهانكم طب هما ليه عاوزين يحولوا التدريب الي شكل وطابع الـ Game بس داخل اطار تعليمي والاسباب الاساسية ان في عملية التعليم بنشوف العامل النفسي للمتدريب والحقيقة ان الارتباط الواضح بين البشر كلهم اثناء الالعاب انهم بيتحفزوا ليها ومن هنا جت نظرية مهمة جدا في الـ Gamification وهي الـ self-determination theory (SDT) يعني ايه الدافع اللي بيخلي الناس تحس بالاستقلالية وتحديد المصير الخاص بيهم وبالتالي يخليهم عاوزين دائما الجديد فيتعلموا اكتر ولقوا 3 حاجات اساسية لو اتحققت الناس دي هتتعلم بسهولة 

1- الناس بتتحفز لما بتاخد قرارات خاصة بيها مستقلة ودا بيحصل في اي لعبة انت بتاخد مصير دورك في اللعبة واللي انت بتمثله.

2- الناس بتتحفز لما بتحس بالتنافسية لازم اكسب واكون نقاط كتير علشان مخسرش.

3- رغبة الناس في تكوين ارتباطات وانهم يكونوا من جزء من عملية منظمة ليها هدف دا بيسعدهم وبيكون جواهم رغبة بالاستمرار وحافز مستمر.

التلت حاجات دول هما المحركات الاساسية في الـ games وهما المحركات الاساسية في الـ gamification.

دلوقتي في حاجة مهمة هي ايه عناصر الـ gamification ؟!

عناصر الـ Gamification كتيرة ومختلفة ومتنوعة وبتختلف من Game لـ Game

1- الاهداف والقواعد الارشادية rules and objectives

اول واهم عنصر من عناصر الـ gamification وفيه بيتم شرح التعليمات والتوجيهات اللي هيستخدمها المتنافسين والفرق اثناء اللعب ودور كل واحد ايه في اللعبة وبيتم شرح باقي العناصر من خلالها ولازم تكون 

* مصممة بتعليمات وتوجيهات واضحة للمتدربين.

* مرتبة بحيث ان تبدأ التعليمات والاهداف من هدف صغير يتحقق في كل خطوة لحد ما يتحدد هدف كبير وهكذا تقسم الاهداف الكبيرة لاهداف صغيرة وخطوات.

* لازم تكون تحفيزية علشان تتنفذ بعد كل خطوة او مجموعة خطوات في الحافز اللي يحرك للي بعدها وهكذا.

فيها مين هيكسب ومين هيخسر .. الحركات اللي هتتم اثناء اللعب .. الاستراتيجية ومستوى المجهود المختلف في كل مستوى.

في حاجة اسمها الـ Learning objective ودي بقي بشكل عام الهدف من اللعبة ايه وعاوزين نوصل لايه.

2- المنافسة والخلاف والتعاون

الخلاف بينشأ علشان هدف معين بين المتنافسين وغالبا بيكون بين الفرق وبعضها اما التعاون فا المقصود بيه التعاون بين التيم الواحد وبعضه ممكن تعمل لعبة المنافسين فيها فرق دول بتعمل بينهم منافسة واختلافات وخلافات طبعا حسب القواعد الارشادية علشان تضفي جو المنافسة اما التعاون فبيبقي بين الفريق وبعضه علشان التماسك ودا مش شرط اساسي لكن دا شكل من اشكاله.

3- التغذية العكسية Feedback 

في انواع كتير من الفيد باك منها 

* التغذية العكسية التأكيدية Confirmational feedback

ودا بيشير الي ان الفعل او النشاط اللي تم دا صحيح ام خطأ من غير ما يصححه.

* التغذية العكسية التصحيحية Corrective feedback

وهنا بيقول ان الفعل اللي تم خطأ مع تصحيحه

* التغذية الرجعية التفسيرية Explanation feedback

بيدعم التغذية العكسية التصحيحية لماذا كان الفعل خطأ بتفسيرات .

* التغذية العكسية التشخيصية Diagnostic feedback

بيفسر ليه الاختيار الخاطئ للفعل تم اختياره ودا ممكن يكون بتوجيه معين مثلا لسلوك المنافسين وبعد الوقوع في الخطأ يتم التعديل.

* التغذية العكسية الطبيعية Natural feedback

وهنا بيتم التأكيد علي ان الفعل دا هو الفعل الطبيعي اللي بيتم في الواقع

* التغذية العكسية المصطنعة او الزائفة Artificial feedback

ودي بتقول ان الفعل دا مش هيحصل في الواقع.

4- الجوائز والانجازات rewards & achievements

بيتم اعطاء المتدربين جوائز في حال انجاز مهمة معينة او خطوة معينة من خطوات الهدف. الاكثار من الجوائز يفقد اللعبة قيمتها وربما يفقد المتدربين نفسهم الحافز لتخطي الخطوات والوصول للمستوى التالي او اخذ المخاطرة حتى ان وجد لذا لا تكثر من استخدام الجوائز.

5- النقاط والشارات والمتصدرون points, badges & Leaderboard

النقاط هي تساعد اللاعبين انهم يتقدموا في الخطوات المرسومة من خلال التعليمات اثناء اللعبة

اما الشارات فهي عبارة عن جائزة لانجاز مهمة غير محسوبة للجوائز وتشكل علامة مميزة

المتصدرون هم من يحصلون علي اعلي مجموع score ونقاط 

6- المستويات Levels

علشان تضيف لمسة المنافسة والحيوية علي الـ gamefication وعلشان تشارك الخبرات الكتير المختلفة شكل اكثر من مستوى كلما اجتازوا مستوى بدأوا في الاخر.

احيانا يلجأ المدربين المصممين للـ gamification انهم يصنعوا 3 مستويات مبتدئ ومتوسط ومتقدم وكل متدرب بيشارك حسب المستوى اللي فيه خبرته طبعا حسب تصميمك انت للعبة .

7- القصصية Storytelling

وهي ربط التعليمات وعناصر الـ game في اسلوب قصصي ليزيد الاندماج وبيكون في عناصرها الشخصيات وفكرة الالغاز والشد والجذب والحلول والقرارات.

8- الفشل واعادة المحاولة Failure & replay

اتاحة الفرصة للمتدربين لان يفشلوا تساعد علي تحسين السلوك في المرات المتتالية لكن ربما يؤدي الى ملل والدخول في دوامة ان اللعبة غير قابلة للانتهاء وحتى ان حددت انتهاءها بشروط ربما تفقد حافزية الاستمرار حسب شروط اللعبة يمكنك استخدام هذا العنصر.

9- المجموع score

لازم يكون واضح جدا لكل متدرب المجموع ودائما يستخدم المجموع لقيادة اللاعبين لسلوك معين وتوجيههم من تعليمات لتعليمات اخرى بحسب مجموعهم.

دا بشكل عام ايه هي الـGamification وايه هي عناصره في المقالات الجاية ان شاء الله هنتكلم عن تصميم الـ gamification وهنجيب امثلة للـ gamification في اشكال مختلفة من تطبيقاتها علي تدريب قطاع البيزنس والـ soft skills