ازاي تخلي المتدرب يوصل لمرحلة التعلم الذاتي Self-Learned ؟

كتير من المدربين مبيبقوش فاهمين هو ليه الناس مخرجوش مستوعبين كل اللي اتقال ؟!

او يسأل نفسه بعد الكورس هو ليه الناس مستفادتش علي الرغم من المعلومات الجديدة ؟!

جانب من دا كنا اتكلمنا فيه قبل كدا في مقالة " ازاي تسرع عملية التدريب " لكن اللي هنتكلم فيه دلوقتى هو مراحل التعلم اللي بيوصلها المتدرب بناء على الانشطة وشكل التدريب اللي بقوم بيه 

الشكل اللي قدامنا دا بيوضح المراحل المختلفة اللي بيوصل لها المتدربين اثناء تحكمهم في عملية التعليم يعني النقطة (a) المدرب هو اللي متحكم تماما في كل عملية التعلم وفي النقطة (i) المتدرب هو اللي متحكم تماما في عملية التعلم 

السؤال المهم بقى " هو ايه اللي بيحصل علشان يوصل المتعلم للتحكم الكامل في عملية التعلم ويوصل لمرحلة Self-learned ؟! "

في النقطة (a) التركيز بيكون علي الالقاء وهنا بيبقي عرض تقديمي Presentation المحاضر بيلقي معلومات والناس بتستمع ولو في تفاعل هيبقي سؤال تفاعلي ليس اكثر ودا اكتر حاجة بتخلي المتدرب عمره ما يوصل للتعلم الذاتي واحيانا بيفقد كل المعلومات اللي بتتقال لانه مشاركش في اي شئ فيها.

في النقطة (b) استخدام structured activities وهنا المدرب بيكون كون مجموعة من التمارين وجمعها في نطاق موضوع معين ونفذها بالتفاعل مع المتدربين الى حد ما دا افضل من النوع اللي قبله لانه بيبقي فيه تفاعل وبيدي جزء للمتدربين يتحكموا في عملية تعلمهم.

من c ل d مناقشة المجموعات Group discussion وهنا اغلب التدريب بيكون عن طريق ان المتدربين بيتقسموا مجموعات وبيتطلب منهم عصف ذهني او مناقشة شئ او مجموعة من التعليمات لتمرين بيتبعوها دي افضل كتير من النقاط اللي قبلها وبتخرج من المتدربين خبرات اكتر وبتخلي في تفاعل اكبر.

من e لـ f دراسة الحالة case study المدرب بيجهز معلومات حول حالة معينة ويضع تعليمات الدراسة والبنود المفروض تناولها اثناء الدراسة ويترك المتدربين في عالم التطبيق اللي هو صنعه ودا بيكون افضل كتير من سابقه.

النقطة (g) المحاكاة simulation بيتم ترتيب المكان او مجموعة اماكن بتعاليم كأنها فعلا البيئة اللي مطلوب التدريب عليها سواء شركة او مصنع او مكتب او اي شئ علشان يستفيد استفادة قصوى بان الشخص هيتدرب علي الحاجة اللي فعلا بيواجهها.

النقطة (h) جولة تعليمية study tour دا شكل افضل للتعلم من سابقه لانه بنزلك المكان نفسه اللي فيه هتشوف كل حاجة في الواقع دا اوقع كتير في عالم التدريب ودا اكتر بيتطبق في التدريبات الفنية لكن يمكن تطبيقه علي المهارات الذاتية والادارية.

النقطة (i) افضل شكل للتعلم هو التجربة والخطأ trial & error انك تخلي المتدرب بنفسه يغلط وبعدين تصلحله الخطأ دا وقتها هيتعلم الحاجة بشكل قوى وهيبقي في مرحلة الـ self-learned في المرحلة دي هو هيبقي قادر علي التعلم بنفسه

في حاجة مهمة جدا جدا ان المرحلة الاخيرة اللي هي التجربة والخطأ بتدي تحكم كامل للمتدرب في عملية التعلم والمرحلة الاولى بتدي تحكم كامل للمدرب ... والسؤال " ازاي اعمل مزيج مابين كل دا بحيث ينجح التدريب بتاعي ؟" دا السؤال اللي هنجاوب عليه في المقالة الجاية ان شاء الله :)