Active learning and passive learning التعلم النشط والتعلم غير النشط

علشان نفهم الـ Active learning خلونا نفرق ما بين الـ Active يعني النشط والـ Passive يعني غير فعال

تخيل ان في 2 متدربين بيحضروا نفس المحاضرة واحد بيتفرج علي المحاضر ومبياخدش اي رد فعل كل اللي بيعمله انه بيسمع وبس تفتكر نسبة تحصيله قد ايه ؟

والمتدرب التاني بيسأل في اجزاء وبيأكد بعض الاجزاء بشوية من الخبرات اللي عنده مع المحاضر تفتكر دا بيتعلم بنسبة قد ايه ؟!

دا التعلم النشط والتعلم الغير فعال .. التعلم النشط شوية حول عملية التعليم من مجرد استقبال المعلومات لتأكيدها بالخبرات ومشاركتها مع المتدربين مبقاش الموضوع مجرد استقبال معلومات بشكل او بآخر ولاحظ اني بقول تعلم نشط "مش بس تدريب" .. يعني اسلوب تعليمك بشكل عام نشط مش بس اللي بيبقي في قاعة تدريب يعني لو قاعد في البيت بتتعلم من فيديو ممكن يبقي تعلم نشط !

في احصائية جميلة كالتالي

We retain:

10% of what we read,

20% of what we hear,

30% of what we see,

50% of what we hear and see,

70% of what we say, and

90% of what we say and do.

(Taken from Communication for the Safety Professional, Robert

Kornikau and Frank McElroy, National Safety Council: Chicago (1975),

pg. 370.)

يعني احنا بنفتكر 50 في المية من اللي بنسمعه ونشوفه "محاضر بيلقي محاضرة مثلا باسلوب شيق" انما بنفتكر 90 في المية من اللي بنقوله ونعمله بنفسنا وهو دا المعني الحقيقي للتعلم النشط.

كمان التعلم النشط له مزايا 

الميزة الاولي : التحدي :-

انت حاطت المتدربين دايما في تحدي اثناء التدريب ودا بيخليهم يدوروا علي مهارات جديدة ومعرفة جديدة يتعلموها عكس التعلم غير الفعال اللي مبيبقاش فيه طلب ولا استخدام لمعلومات ولا مهارات جديدة.

الميزة التانية : التأكيد :-

انت من خلال التعلم النشط تقدر تتأكد ان المعلومات وصلت بالفعل للمتدربين ولا لآ ودا يديلك ارتياحية وانت بتعلى معاهم في مراحل التعلم بدل ما كانت مرحلة هتبدأ تدخل في معلومات ومهارات اعمق واعلى ودا بيخلي دايما المتدربين في حالة تحفيز دائم.

الميزة الثالثة : الـ feedback :-

وهنا انت بتاخد تغذية رجعية عن المعلومات اللي اتعلموها وعن اللي محتاج تطوير لسا وعن اللي بالفعل تم تطويره وبيديلك تقييم للي انت طبقته معاهم وصل لهم بنسبة قد ايه؟

في كتب كتيرة اتكلمت عن التعلم النشط وازاي تعمله وفي كمان كتب كتيرة كتبت مباشرة عن التدريبات وورش العمل اللي ممكن تستخدمها تعمل تعلم نشط زي كتاب 101 more training games وفي مواقع كتيرة وناس كتيرة بتشارك ورش عمل لكن المهم تستخدمها في مكانها الصحيح وتشاركها.

التعلم النشط مش بس انك تشارك الناس معاك التعلم النشط الصحيح انك تشارك الناس معاك كمدرب ومع بعضهم كمتدربين ومع الموضوع نفسه اللي بتتكلم عنه لكل واحد على حدى.

ميزة التعلم النشط انك ممكن تستخدم نفس التمرين او ورشة العمل لاكتر من هدف وتطلع منها اكتر من معني في كورسات وتدريبات مختلفة "يعني نفس التمرين اللي بتستخدمه في القيادة بتعلمهم فن التعامل مع الاتباع ممكن تستخدمه هو هو في فن التفاوض !"

في المقالات الجاية عن التعلم النشط هنتكلم اكتر عن امثلة وعن تطبيقات وهيبقي في فيديوهات للكلام دا ان شاء الله :)