مفاهيم هامة للمدربين Instructional design, active learning, simulation and gamification

في شوية مفاهيم اساسية لازم تكون عارفها كمدرب ولازم نفرق مابينهم هشرحهم هنا بالعربي علشان هنستخدمهم كتير الفترة الجاية في مقالات هنحتاج ان احنا نفهمهم تفصيليا بعد كدا وبعضهم هننزله فيديوهات ان شاء الله :)

اولا :- الـ Instructional design :-

معناها الحرفي يعني تصميم العملية التدريبية وهو مجموعة التعليمات اللي بنمشي عليها من بداية التدريب لنهايته وفيه بنصمم العملية التعليمية للكورس بتاعنا او لاي تدريب بنعمله ومثال علي دا ويمكن اقواهم واللي هنشرحه بالتفصيل بعد كدا هو نموذج ADDIE

A = Analyze تحليل

D = Design تصميم 

D = Development تطوير

I = Implement تنفيذ

E = Evaluate تقييم

دا واحد من نماذج الـ Instructional design ويمكن اشهرهم علي الاطلاق وهنستفيض في شرحه ان شاء الله لاحقا.

ثانيا :- الـ Active learning :-

باختصار هو انك تخلي عملية التعليم بتاعتك نشطة والتعلم النشط يعني انك تخلي المتدربين دائما متحفزين ونشطين لانهم يستقبلوا منك معلومات جديدة ودا طبعا مش هيتم بانك تدي القاء طول الوقت.

مثال يوضح اكتر لو عندنا اتنين مدربين واحد دخل قعد 4 ساعات يعمل ورش عمل ويقسم الناس مجموعات ويخليهم يتناقشوا مع بعضهم ويشاركوا خبراتهم ويطلعوا نتائج مفيدة وحد تاني دخل قاعة التدريب اكتر تمرين عمله انه قالهم يجاوبوا علي اسئلة هو قالها وبس تفتكروا كدا مين عمل تعلم نشط اكتر ؟!

بالتأكيد الاول.

هنشرح اساليب وفنيات عمل تدريب نشط بالتفصيل ان شاء الله في المقالات القادمة.

ثالثا :- الـ Simulation :-

المحاكاة في اي شئ انك تحاكي الواقع بس داخل مكان "تمثيلي" يعني بتمثل كأنك في الواقع في ناس بتوصل معاها درجة المحاكاة مثلا في قاعات التدريب انه يوفر كل الامكانيات والادوات كأنه فعلا في بيئة العمل فلما الموظف يغلط اثناء التدريب يمكن اصلاح اخطاءه وبالتالي هو اتعلم الحاجة علي الواقع الافتراضي اللي هيأتهوله جوا قاعة التدريب.

المحاكاة من اقوى اساليب التدريب اللي ناس كتير اوي بتلجأ ليها علشان تعلم موظفينها كما ينبغي ان يكون.

رابعا :- الـ Gamification :-

هو مفهوم جديد واسلوب بيستخدم من بدري في التعلم لكن بعشوائية بدأ الفترة الاخيرة يترجم الي جزء مهم من عملية التدريب وفي الاسلوب دا انت بتخلق جو شبه اللعبة وشبه المحاكاة لكنه حاجة مختلفة بتوصل بيها مهارات بيبقي ليها عناصر كتير وبيبقي في حافز وجائزة للكسبان.

مثال قوي ليه شفته في كل دروس الـ gamification اللي اتعلمتها هو لعبة Monopoly "حاجة شبه بنك الحظ بس بالانجليزي :D "